काठमाडौं । भारतमा जारी इण्डियन प्रिमियर लिग (आईपीएल) मा सनराइजर्स हैदराबादले तेस्रो जित जित निकालेको छ । तेस्रो जित निकाल्नेक्रममा गएराति सम्पन्न खेलमा हैदराबादले दिल्ली क्यापिटल्सलाई ९ रनले हरायो ।
दिल्लीले भने घरेलु मैदानमै हार बेहोर्यो । आफ्नो आठौँ खेलमा हैदराबादले दिएको १ सय ९८ रनको लक्ष्य पछ्याएको दिल्लीले निर्धारित २० ओभरमा ६ विकेट गुमाएर १ सय ८८ रन मात्र बनाउन सक्यो । उसका लागि मिचेल मार्शले अलराउन्ड प्रदर्शन गरे पनि दिल्लीले हार टार्न सकेन ।
उनले ३९ बलमा ६ छक्का र १ चौकाको मद्दतमा ६३ रनको पारी खेले । फिल साल्टले ३५ बलमा ९ चौकासहित ५९ रन बनाए । अक्षर पटेल २९, रिपल पटेल ११ रनमा अविजित रहँदा प्रियम गर्ग १२ रनमा आउट भए ।
कप्तान डेविड वार्नरले भने खाता खोल्न सकेनन् । हैदराबादका लागि मयंक मार्कन्डेले २, अभिषेक शर्मा, भुवनेश्वर कुमार, अकिल हुसेन र टी नटराजनले १-१ विकेट लिए ।
त्यसअघि दिल्लीस्थित अरुण जेट्ली स्टेडियममा टस जितेर ब्याटिङ रोजेको हैदराबादले निर्धारित २० ओभरमा ६ विकेट गुमाएर १ सय ९७ रन बनायो । उसका लागि अभिषेक शर्माले ३६ बलमा १२ चौका र १ छक्कासहित सर्वाधिक ६७ रन बनाए ।
विकेटकिपर हेनरिक क्लासेनले २७ बलमा ४ छक्का र २ चौकाको मद्दतमा अविजित ५३ रनको पारी खेले । अब्दुल समदले २८, अकील हुसेनले अविजित १६ रन बनाउँदा राहुल त्रिपाठी ११ रनमा आउट भए । दिल्लीका लागि मिचेल मार्शले ४ ओभरमा एक मेडन फालेर २७ रन दिँदै ४ विकेट लिए ।
अक्षर पटेल र इशान्त शर्माले १र१ विकेट हात पारे । यो जितपछि हैदराबाद तालिकाको आठौँ स्थानमा उक्लिएको छ । उसले ८ खेलमा ५ मा हार तथा ३ खेलमा जित हात पारेको छ । पुछारमा रहेको दिल्लीले भने ८ खेल्दा ६ मा हार तथा २ खेलमा मात्र जित निकालेको छ ।
प्रतिक्रिया