मुम्बईलाई हराउँदै आईपीएलको दोस्रो स्थानमा उक्लियो गुजरात

काठमाडौं । भारतमा जारी इण्डियन प्रिमियर लिग (आईपीएल) मा गत संस्करण विजेता गुजरात टाइटन्सले मुम्बई इण्डियन्सलाई ५५ रनले हराएको छ । जारी सिजनमा गुजरातको यो पाँचौँ जित हो ।

मुम्बईले भने लगातार दोस्रो तथा समग्रमा चौथो हार बेहोर्यो । सातौँ खेलमा गुजरातले दिएको २ सय ८ रनको लक्ष्य पछ्याएको मुम्बईले निर्धारित २० ओभरमा ९ विकेट गुमाएर १ सय ५२ रन मात्र बनाउन सक्यो । उसका लागि नेहल वढेराले ४०, क्यामरन ग्रीनले ३३, सूर्यकुमार यादवले २३, पियुष चावलाले १८, अर्जुन तेन्दुलकर र इशान किशनले १३/१३ रन बनाए ।

बाँकी ब्याटरले भने दोहोरो अंकमा समेत रन जोड्न सकेनन् । गुजरातका लागि नूर अहमदले ३, राशिद खान, मोहित शर्माले २/२ र हार्दिक पाण्ड्याले १ विकेट हात पारे । त्यसअघि अहमदाबादस्थित नरेन्द्र मोदी स्टेडियममा टस हारेर ब्याटिङको निम्तो पाएको गुजरातले निर्धारित २० ओभरमा ६ विकेट गुमाएर २ सय ७ रन बनायो ।

उसका लागि शुभमन गिल, अभिनव मनोहर र डेविड मिलरले उत्कृष्ट पारी खेले । ३४ बलको सामना गरेका गिलले ७ चौका र १ छक्कासहित सर्वाधिक ५६ रन बनाए । त्यस्तै, मिलरले २२ बलमा ४ छक्का र २ चौकाको सहयोगमा ४६ रनको इनिङ खेले ।

मनोहरले २१ बलमा ३ छक्का र ३ चौकाको मद्दतमा ४२ रन बनाए । राहुल तेवटियाले ५ बलमा ३ छक्कासहित २० रनको आक्रामक पारी खेले । विजय शंकर १९ र कप्तान हार्दिक पाण्ड्या १३ रनमा आउट भए । मुम्बईका लागि पियुष चावलाले २, जेसन बेहरेन्डोर्फ, अर्जुन तेन्दुलकर, रिली मेरिडिथ र कुमार कार्तिकेयले १/१ विकेट लिए ।

यो जितसँगै गुजरात अंक तालिकाको दोस्रो स्थानमा उक्लिएको छ । ७ खेलमा ५ मा जित र २ खेलमा हार बेहोरेको गुजरातले १० अंक जोडेको छ । सातौँ स्थानको मुम्बईले ७ म्याचमा ३ मा जित र ४ खेलमा हार बेहोरेको छ ।