प्रधानमन्त्री बनेकोमा चीनले दियो प्रचण्डलाई बधाई

काठमाडौं । नेकपा माओवादी केन्द्रका अध्यक्ष एवं संसदीय दलका नेता पुष्पकमल दाहाल प्रचण्ड प्रधानमन्त्रीमा नियुक्त भएकोमा छिमेकी मित्रराष्ट्र चीनले पहिलो बधाई दिएको छ ।

नेपालस्थित चिनियाँ दूतावासले आइतबार राति ट्वीट गर्दै बधाई दिएको हो । नेपाली र अंग्रेजी भाषामा दुई वटा ट्वीट गर्दै दूतावासले अध्यक्ष प्रचण्डलाई ४४ औं प्रधानमन्त्री भएकोमा बधाई दिएको हो ।

सात दल र स्वतन्त्रसहित १७० सांसदको समर्थनसहितको दाबी गरेपछि अध्यक्ष प्रचण्डलाई राष्ट्रपति विद्यादेवी भण्डारीले आइतबार प्रधानमन्त्रीमा नियुक्त गरेकी छिन् । प्रचण्डको सपथग्रहण भोलि हुने कार्यक्रम रहेको छ ।

अध्यक्ष प्रचण्डलाई नेपालको ४४ औं प्रधानमन्त्रीमा नियुक्त्त हुनुभएकोमा हार्दिक बधाई !!

— Spokesperson Of Chinese Embassy In Nepal (@PRCSpoxNepal) December 25, 2022