राजु गुरुङको रिट आज पहिलो नम्बरमा, अन्तिम निर्णय आउन सक्ने

काठमाडौं । रुपन्देही-२ मा सत्ता गठबन्धनबाट एकीकृत समाजवादीका उम्मेदवार राजु गुरुङको रिटमाथिको पेशी आज पहिलो नम्बरमा परेको छ । सो रिट माथिको सुनुवाई सर्वोच्च अदालतका न्यायाधीस इश्वर प्रसाद खतिवडा र कुमार रेग्मीको इजलासमा पहिलो नम्बरको सूचीमा परेको हो ।

निर्वाचन कार्यालयले बेंकीङ कसुर अन्तर्गत कालोसूचीमा नाम भएको भेटेपछि गुरुङको उम्मेदवारी खारेज गरेको थियो । त्यस विरुद्ध सर्वोच्च पुगेका गुरुङको उम्मेदवारी खारेजको निर्णय कार्यान्वयन नगर्न यस अघि सर्वोच्चले अल्पकालिन अन्तरिम आदेश दिइसकेको छ ।

निर्वाचन आयोगलाई विपक्षी बनाएर दायर गरिएको रिटमा आज दुबैपक्षका कानुन व्यवसायीहरुले बहस गर्ने छन् । सम्भवत आज अन्तरिम आदेशले निरन्तरता पाउने वा रिट खारेज हुने सम्बन्धमा निर्णय आउन सक्ने अनुमान गरिएको छ ।