काठमाडौं । प्रमुख निर्वाचन आयुक्त दिनेशकुमार थपलियाले प्रदेश र प्रतिनिधिसभा सदस्यको निर्वाचनको मिति घोषणा हुन लागेको बताएका छन् ।
निर्वाचन आयोगले आयोजना गरेको पत्रकार सम्मेलनमा बोल्दै प्रमुख आयुक्त थपलियाले आउँदो मन्त्रिपरिषद् बैठकले मिति तोक्न सक्ने बताएका हुन् । थपलियाले यसअघि नै आयोगले मिति घोषणाका लागि सरकारलाई सिफारिस गरिसकेको बताउँदै सोही सिफारिसको आधारमा आगामी मंसिर ४ गते एकै चरणमा निर्वाचन मिति घोषणा हुनसक्ने जिकिर गरे ।
‘आयोगले सम्पूर्ण व्यहोरासहित एकैचरणमा प्रदेश र प्रतिनिधिसभा सदस्यको निर्वाचन मंसिर ४ गते गर्न मिति सिफारिस गरिसकेको छ, थपलियाले भने, अब मन्त्रिपरिषद्ले मिति तोक्न बाँकी हो । आउँदो मन्त्रिपरिषद् बैठकले मंसिर ४ गतेका लागि निर्वाचनको मिति तोक्यो भने त्यसलाई आश्चर्य नमान्दा हुन्छ ।’
निर्वाचनका लागि सबै तयारीको काम भैसकेको प्रमुख निर्वाचन आयाुक्त थपलियाले जनाए । स्थानीय तह निर्वाचन भन्दा संघ र प्रदेशको निर्वाचन कम खर्चिलो हुनसक्ने थपलियाले बताए । स्थानीय तह निर्वाचनमा प्रयोग भएका निर्वाचन सामाग्रीलाई आगामी निर्वाचनमा पनि प्रयोग गर्न सक्ने गरी सामाग्रीहरुको फेहरिस्त तयार पार्ने काम भैरहेको उनले जानकारी दिए ।
एकै चरणमा निर्वाचन गर्दा खर्च कम हुने उनले जिकिर गरे । अघिल्लो निर्वाचनमा भन्दा २ अर्ब १५ रुपैयाँ खर्च कटौती भएको उनले जानकारी दिए ।
आयोगले स्थानीय तह निर्वाचनमा ५ अर्ब ४ करोड खर्च भएको जनाएको छ ।
प्रतिक्रिया