पाँचथरमा पहिरो अपडेट : १ जना मृत फेला, २ जना अझै बेपत्ता

पाँचथर । पाँचथरमा अविरल वर्षासँगै गएको पहिरोले पुर्दा एकै परिवारका एक जनाको मृत्यु भएको छ भने २ जना अझै बेपत्ता भएका छन् ।

पाँचथरको फालेलुङ गाउँपालिका वडा नम्बर ७, बिहिदिनमा गएराती आएको पहिरोले घर र गोठ पुरिदा बेपत्ता भएको मध्ये ४२ वर्षीय रुपलाल मगर पुरिएको अवस्था मृत फेला परेको जिल्ला प्रहरि कार्यालय पाँचथरका प्रहरी नायव उपरिक्षक राकेश थापाले जानकारी दिए ।

मगरलाई शनिबार बिहान ८ः१५ बजे फेला पारिएको प्रहरिले बताएको छ । उनको बुहारी ३८ वर्षीया गोमा मगर र उनको १९ वर्षीय भतिजि एलिसा मगर बेपत्ता भएको प्रहरीले बताएको छ । बेपत्ताहरुको उद्धार कार्य जारी रहेको तर बेपत्ताहरु फेला पार्न नसकिएको प्रहरीले बताएको छ ।

स्थानीय ७१ वर्षिय दल प्रसाद मगरको घर पहिरोले बगाएको हो । मगरलाई भने तत्काल प्रहरीले सकुशल उद्धार गरेको थियो । बेपत्ताहरुको खोजी नेपाल प्रहरी, सशस्त्र प्रहरी बल र नेपाली सेनाले गरिरहेको जिल्ला प्रहरी कार्यालय पाँचथरले जानकारी दिएको छ ।