काठमाडौं । लामो कसरत पछि सत्तारुढ गठबन्धनमा महानगरपालिका र उपमहानगरपालिकाको भागबण्डामा सहमति जुटेको छ ।
मंगलबार दिउँसो र राती दुई पटक बालुवाटारमा भएको गठबन्धनका शीर्ष नेताको बैठकले ६ महानगर मध्य तीन महानगरको नेतृत्व कांग्रेसले लिने, माओवादी, एकीकृत समाजवादी र जनता समाजवादी पार्टीले एकरएक महानगरको नेतृत्व दिने सहमति भएको बताइएको छ भने ७ उपमहानगरपालिका कांग्रेसले नेतृत्व गर्ने र २ वटा माओवादीलाई तथा एक एक वटा जसपा र एकीकृत समाजवादीलाई दिने गरि सहमति भएको गठबन्धन दलका उच्च स्रोतले दाबी गरेको छ ।
सहमति अनुसार नेपाली कांग्रेसले काठमाडौं, ललितपुर र विराटनगर महानगरपालिकाको नेतृत्व लिने छ भने पोखरा महानगरपालिकाको नेतृत्व एकीकृत समाजवादीले पाउनेछ । त्यस्तै नेकपा माओवादी केन्द्रले भरतपुर महानगरपालिका र जनता समाजवादी पार्टीले वीरगञ्ज महानगरपालिकाको नेतृत्व पाउने छ ।
११ वटा उपमहानगरपालिका मध्ये काँग्रेसले ७ वटामा प्रमुख पाउने पक्का भएको छ । माओवादी केन्द्रले २, एकीकृत समाजवादी र जसपाले एक–एक उपमहानगरपालिका प्रमुख पाएको बताइएको छ । स्रोतका अनुसार काँग्रेसलाई बुटवल, तुल्सीपुर, इटहरी, धरान, कलैया, नेपालगञ्ज र धनगढीको उपमहानगरपालिकाको नेतृत्व गर्ने छ भने माओवादीले घोराही र जीतपुर उपमहानगरमा मेयर लिने छ । त्यसैगरि एकीकृत समाजवादीले हेटौडा र जसपाले जनकपुर उपमहानगरको नेतृत्व लिने सहमति भएको छ ।
त्स्तै दलहरुकाबीच नेपालगन्ज र धनगढी बाहेकका उपमहानगरका उपमेयरको पनि टुँगो लागेको बताइएको छ । सहमति अनुसार काँग्रेसले जनकपुर, हेटौडा, जितपुर सिमरा र घोराही उपमहानगरपालिका उपमेयरमा लिएको छ । धरान उपमहानगरपालिका उपमेयर माओवादी केन्द्रले पाएको छ भने इटहरी, बुटवल र तुल्सीपुरमा एकीकृत समाजवादीले उपमेयर पाउने भएको छ । जसपालाई कलैया उपमहानगरको उपमेयर छाडिएको छ ।
नेपालगञ्जमा जसपा र धनगढीमा माओवादीले उपप्रमुखमा दाबी कायम राखेका कारण टुङ्गो नलागेको स्रोतले बतायो । सम्भवत नेपालगन्जको उपमेयर जसपालाई दिएर धनगढीमा माओवादीले लिन सक्ने सम्भावना रहेको आँकलन गरिएको छ ।
प्रतिक्रिया