अपिलको माध्यमबाट माओवादी केन्द्रको प्रारम्भिक घोषणापत्र सार्वजनिक

बुटवल । नेकपा माओपादी केन्द्रले स्थानीय निर्वाचनलाई लक्षित गर्दै आफ्नो प्रतिबद्धता सहितको अपिल प्रकाशित गरेको छ । स्थानीय निर्वाचनलाई लक्षित गर्दै प्रकाशित गरिएको माओवादीको अपिलमा पुर्व पश्चिम रेलमार्ग, मध्यपहाडी लोकमार्ग, उत्तर–दक्षिण जोड्ने कोरीडोर सडक, देशका विभिन्न भुभागलाई जोड्ने सडक सञ्जालको निर्माण, विमानस्थल र हवाई सेवा विस्तार, सञ्चार प्रविधिको विकास, उर्जा उत्पादन र विद्युतिकरण, कृषि, पर्यटन र वन तथा प्राकृतिक सम्पदाहरुको विकास, छिमेकीहरुसँगको सन्तुलित सम्बन्ध, शिक्षा र स्वास्थ्य नीतिमा भएका जनपक्षीय परिवर्तन, सामाजिक सेवाको क्षेत्रमा राज्यको दायित्वमा गुणात्मक बृद्धि आदी नीतिहरु माओवादीले नै कोरेको मार्ग चित्र भएको दाबी गरिएको छ ।

अपिलमा जनक्रान्तिका उपलब्धिहरुको रक्षा र सामाजिक न्याययसहित आर्थिक सामाजिक रुपान्तरण नै समाजवाद उन्मुख समृद्धिको सार भएको उल्लेख गर्दै सामाजिक न्यायसहितको आर्थिक विकास र राष्ट्रिय स्वाधीनताको थप सुदृढीकरण समाजवाद उन्मुख समृद्धिका दुई मुख्य पिलर भएको लेखिएको छ । ‘समाजवादको परम्परागत मोडेलप्रति उदासिन र बजारका एकाधिकारबाट पीडित हुँदै निराश र निमुखा बन्दै गएका जनसमुदायको विशाल हिस्सालाई आर्थिक सामाजिक विकासको साझेदार बनाउने र उनीहरुलाई प्रतिफलको हिस्सेदार समेत बनाउने नेकपा (माओवादी केन्द्र) को विकास मोडेलबाट नै समाजवाद उन्मुख समृद्धि सम्भव हुँदै जानेछ ।’ अपिलमा भनिएको छ ।

‘सार्वजनिक, सामुदायिक (सहकारी) र निजी क्षेत्रको पहल कदमी र सहकार्यमा आधारित आर्थिक विकासको मोडेलबाट हामीले सामाजवाद उन्मुख समृद्धिको परिकल्पना गरेका छौं ।’ अपिलमा लेखिएको छ, -‘नागरिकका आधारभूत आवश्यकताको परिपूर्ती र गरिबी निवारण, वस्तु तथा सेवाको सहज आपूर्ती, उत्पादनमुखी अर्थव्यवस्थाको निर्माण, रोजगारीका अवसरहरुको सिर्जना, विचौलियाहरुको भूमिकालाई न्यूनीकरण, वातावरण मैत्री विकास पूर्वाधार, आर्थिक सामाजिक तथा वातावरणीय विकासको सन्तुलन आदि हाम्रो विकास नीति र प्राथमिकता हुन् ।’

पूर्ण पाठ :
[pdf-embedder url=”https://www.khabarkura.com/wp-content/uploads/2022/04/Apeal_Maoist-Centre-2078-12-20.pdf” title=”apeal”]