काठमाडौं । पाँचौं झापा गोल्डकपको उपाधि त्रिभुवन आर्मी फुटबल क्लबले उचालेको छ ।
झापाको डोमालाल रंगशालामा सोमबार भएको फाइनल खेलमा झापा-११ लाई २-१ गोल अन्तरले पराजित गर्दै आर्मीले उपाधि हात पारेको हो ।
उपाधिका लागि आर्मीका टेकबहादुर १८ औं मिनेटमा टेकबहादुर बुढाथोकी र २० औं मिनेटमा जर्ज प्रिन्स कार्की एक/एक गोल गरेका थिए । झापा-११ का लागि विमल घर्ती मगरले २४ औं मिनेटमा एक गोल फर्काएका थिए ।
पहिलो हाफमा २-१ को अग्रता कायम गरेको आर्मीले सोही अग्रतालाई कायम राखेको थियो । दोस्रो हाफमा झापाले गोलका लागि निकै प्रयास गरे पनि सफलता हात पार्न सकेन । योसँगै आर्मीले चौथो पटक झापा गोल्डकपको उपाधि जितेको छ ।
झापा-११ ले भने पाँच पटक नै उपविजेतामा चित्त बुझाएको छ । प्रतियोगितामा विजयी आर्मीले नगद १२ लाख ५५ हजार र उपविजेता झापा-११ ले ६ लाख पाँच हजार हात पारेको छ । समापन समारोहमा झापा-११ फुटबल क्लबका फरवार्ड विशाल राई ‘ए’ लाइफ टाइम अचिभमेन्ट अवार्डबाट सम्मानित गरिएको छ ।
प्रतिक्रिया