काठमाडौं । नेपालले अफ्रिकी देश मौरिससविरुद्ध खेलेको दोस्रो मैत्रीपूर्ण खेल तनावपूर्ण रुपमा सम्पन्न भएको छ । खेल मैत्रीपूर्ण भएपनि खेलाडी र अफिसियलले मैदानमा अमैत्री ब्यवहार देखाएका छन् ।
दशरथ रंगशालामा मंगलबारको खेल प्रारम्भमा उत्कृष्ट रुपले चलेको थियो । तर नेपालको सुरुवाती गोल र मौरिससले लगत्यै पेनाल्टी मिस गरेपछि खेल अन्तिमसम्म तनावपूर्ण रह्यो । खेल नेपालले १-० गोलले जित्यो । १० औँ मिनेटमा सुजल श्रेष्ठले गरेको गोल नेपालको जितमा प्रयाप्त भयो । डिबक्सभित्र घम्साघम्सीबीच पुजन नगरकोटीले उपलब्ध गराएको बलमा सुजलले पोस्ट नजिकबाट जाली चुमाएका थिए । नेपालका लागि सुजलको यो अन्तर्राष्ट्रिय तेस्रो गोल हो ।
नेपालको अग्रतापछि जोसिएको मौरिससले लगत्यै पेनाल्टी पाएको थियो । मोरिससका कप्तान एन्डी सोफीको पेनाल्टी प्रहारलाई नेपालका कप्तान एवं गोलरक्षक किरण चेम्जोङले सजिलै विफल पारे । ११ औँ मिनेटमा नेपालका दिनेश राजवंशीले लिन्सले ब्रेजलाई डिबक्सभित्र लडाएपछि मौरिससले पेनाल्टी पाएको थियो ।
पहिलो खेलको तुलनामा दोस्रो खेलमा उत्कृष्ट प्रदर्शन गरेको मोरिससको थप शसक्त प्रहारमा नेपालका गोलरक्षक किरण बाधक बने । किरण ‘म्यान अफ दि म्याच’ बने । उनले ७५ हजार रुपियाँ पुरस्कार पनि प्राप्त गरे ।
थप तनावपूर्ण दोस्रो हाफ
दोस्रो हाफमा खेल थप तनावपूर्ण बन्यो । दोस्रो खेलमा मौरिससले अघिल्लो खेलमा कोरोनाका कारण नखेलेका चार खेलाडी खेलाएको थियो । मौरिससले दोस्रो हाफमा नेपाललाई कडा चुनौती दिएको थियो ।
८० औँ मिनेटमा दुवै तर्फका खेलाडी एक आपसमा हात हालाहालको अवस्थामा पुगे । कार्डको बर्षा भएको खेलमा मौरिससले नौ र नेपालले १० खेलाडीमा खेल सकाए । रेफ्री नविन्द्र महर्जनलाई खेल कन्ट्रोल गर्न हम्मेहम्मे परेको थियो ।
खेलाडी टसलमा उत्रिएपछि मौरिससका एडरिन बोटबर र इमानुल फुलचन्ड तथा नेपालका पुजन उपरकोटीले दोहोरो पहेँलो (रातो) कार्ड पाए । पुजनले विपक्षी खेलाडीको मुखमा बलले हानेपछि झगडाले चर्को रुप लिएको थियो ।
मैदानभित्र खेलाडीबीच चलेको द्वन्द्वमा सामेल हुन पुगेपछि नेपालका गोलरक्षक प्रशिक्षक विकास मल्लले पनि रातो कार्ड पाए । कार्डको बर्षा भएको खेलमा नेपालले चार र मौरिससले सात वटा पहेँलो कार्ड पाएको थियो ।
तनावकै बीच खेलको अन्तिममा रंगशालाको फ्लड लाईट पूर्ण रुपमा नबलेपछि खेल १० मिनेट रोकिएको थियो । विजुली बत्ती गएर स्कोर बोर्ड समेत पूर्णब न्द भएपछि रेफ्री नवीन्द्रले १० मिनेट खेल रोकेर पुनः सञ्चालन गरेका थिए ।
मौरिसससँगको खेलसँगै रक्षक नवीन गुरुङले डेब्यु गरे । त्यसअघि नेपालले शनिबार भएको पहिलो खेलमा मौरिससलाई १-० गोलले नै हराएको थियो । पहिलो खेलमा नेपालका लागि विमल घर्तीमगरले निर्णायक गोल गरेका थिए ।
फुटबलमा तनाव स्वभाविकः अल्मुताइरी
नेपालका प्रशिक्षक अब्दुल्लाह अल्मुताइरीले फुटबल खेलको क्रममा मैदानमा तनाव हुनु स्वभाविक भएको बताएका छन । ‘फुटबलमा कहिले काँही यस्तो हुन्छ । मैदानमा हार वा जितले तनाव पैदा हुन्छ । नियन्त्रण गर्न र सम्हालिन नसक्दा त्यस्तो हुन्छ,’ अल्मुताइरीले भने ।
उनले आफुले दुवै खेलमा जितको आशा नगरेको पनि बताए । ‘मलाई दुवै खेलमा जित निस्किन्छ भन्ने लागेको थिएन । एक जित र एक हार वा एक जित र एक बराबरी होला भन्ने लागेको थियो । तर दुवैमा जित निस्कँदा खुशी छु । यसले नेपालको फिफा वरीयतामा सुधार गर्नेछ । आजको खेलले शारिरिक रुपले बलियो खेलाडीसँग पनि नेपालले खेल्न सक्छ भन्ने प्रमाणित भएको छ । टोलीमा डेब्यु गरेका नयाँ खेलाडीले पनि राम्रो प्रदर्शन गरेका छन्,’ अल्मुताइरीले भने । कोरोनाको संक्रमण हुने डरले पनि आफुले यस खेलका लागि दुई टोली तयार पारेको उनको भनाई थियो ।
यसैगरी मौरिससका प्रशिक्षक टोनी फ्रान्कोइसले नेपाली खेलाडीले अनावश्यक रुपमा उत्तेजित बनाउँदा खेलमा तनाव उत्पन्न भएको बताए । ‘पहिलो खेलको तुलनामा खेलाडीले धेरै राम्रो खेले । मौका लगातार पाएको हो । पेनाल्टी मिस हुनु हारको अर्को कारण बन्यो । खेलमा तनाव हुनुको दोष रेफ्रीलाई दिएर हुँदैन । दशरथ रंगशालाको पिच पनि त्यति राम्रो थिएन । हामीले साँढे दुई बर्षपछि अन्तर्राष्ट्रिय खेल खेलेका हौँ । अब सुधार गर्दै जानेछौँ, टोनीले भने, ‘नेपालको आतिथ्य र अनुभव राम्रोसँग सँगालेर राख्नेछौँ ।’ आजको गोरखापत्र दैनिकमा गोविन्द रेग्मीले यो समाचार लेखेका छन ।
प्रतिक्रिया