रुकुम पश्चिममा प्रहरी र स्थानीय युवाबीच झडप ७ प्रहरी घाईते

रुकुम पश्चिम । रुकुम पश्चिमको सदरमुकाम खंलगामा प्रहरी र स्थानीय युवाबीच झडप हुँदा ७ जना प्रहरी घाइते भएका छन् । शुक्रबार राति खलँगाको बागबजारमा भएको झडपमा प्रहरी सहायक निरीक्षक कोमलराज बोहरासहित ७ जना प्रहरी घाइते भएको प्रहरीले जनाएको छ ।

जिल्ला प्रहरी कार्यालयका सूचना अधिकारी प्रहरी निरीक्षक कपिल शाहीका अनुसार घाइते प्रहरी सहायक निरीक्षक बोहरालाई राती नै थप उपचारको लागि नेपालगंज मेडिकल कलेज कोहलपुर लगिएकोमा नेपालगन्जमा उपचार सम्भव नभएपछि काठमाडौं लगिएको छ ।

प्रहरीका अनुसार शुक्रबार राती अन्दाजी नौ बजेको समयमा मुसिकोट नगरपालिका–१ बागबजार नजिकै छेउमा पार्किङ्ग गरी राखेको रा १ ख २३९२ नम्बरको ट्रकलाई ढुंगा र बियरको बोतल प्रहार गरेर सिसा फुटाएको भन्ने सूचनाका आधारमा ढुँगा तथा बियरको बोटल प्रहार गर्ने कार्यमा संलग्न स्थानीय युवालाई नियन्त्रण गर्न खोज्दा झडप भएको थियो । सडकमा हो हल्लागर्नेहरुलाई नियन्त्रण गर्न खोज्दा प्रहरीमाथी नै ढुंगामुढा र बोतल समेत प्रहार गरेपछि मुठभेडको अबस्था सिर्जना भएको प्रहरी निरिक्षक शाहीले बताए ।