बावुले प्रहार गरेकाे गोली लागेर छोराको मृत्यु

पाल्पा। पाल्पाको रिब्दीकोट गाउँपालिका–६ ठिमुरेको बावुले चलाएको गोली लागेर छोराको मृत्यु भएको छ । रिब्दीकोटको तल्लोताल गाउँमा स्याललाई हानेको गोली लागेर धनबहादुर लम्तरीको मृत्यु भएको हो ।

स्थानीय ५६ वर्षीय कर्णबहादुर लम्तरीले स्याललाई बन्दुक हान्दा आफ्नै ३५ वर्षीय छोरा धनबहादुर लम्तरीको टाउकोमा गोलि लागेको थियो । छोरा लम्बतरीको घटनास्थलमै मृत्यु भएको जिल्ला प्रहरी कार्यालय पाल्पाका प्रवक्ता प्रहरी नयाव उपरिक्षक रामेश्वर त्वातीले बताए ।

प्रहरीका अनुसार कर्णबहादुरले आफ्नै घरदेखि सय मिटर नजिकै मकै बारीमा आएको स्याललाई हानेको गोली छोरा धनबहादुरलाई लागेको प्रहरी समक्ष बयान दिएका छन् । प्रहरीले घटनास्थलबाट एक नाले भरुवा बन्दुक बरामद गरेको छ । गोली हान्ने कर्णबहादुरलाई पक्राउ गरी थप अनुसन्धान गरिएको प्रहरीले जनाएको छ ।