दाम्लोले बाँधेर जनता कुट्ने वडाअध्यक्ष प्रहरीबाट पक्राउ

जाजरकोट । दाम्लोले बाँधेर स्थानीय युवालाई कुटपिट गर्ने जाजरकोटको जुनिचाँदे गाउँपालिका–२ का वडाध्यक्षलाई प्रहरीले पक्राउ गरेको छ । साउन १५ गते स्थानीय सर्पे दमाइलाई डोरीले बाँधेर कुटपिट गरेका वडा अध्यक्ष रामबहादुर नेपालीलाई बिहीबार जाजरकोट प्रहरीले पक्राउ गरेको हो ।

इलाका प्रहरी कार्यालय पञ्चालाको टोलीले उनलाई घरबाटै नियन्त्रणमा लिएर सदरमुकाम खलंगा झिकाइएको जिल्ला प्रहरी कार्यालय जाजरकोटले जनाएको छ ।

बुधबार साँझ पञ्चाला प्रहरी चौकीको टोलीले उनलाई घरबाटै नियन्त्रणमा लिएको जिल्ला प्रहरी कार्यालय जाजरकोटका प्रहरी निरीक्षक खुमानन्द पाण्डेले बताए ।

‘टाढा भएका कारण इलाका प्रहरीहरु मार्फत ठाँउसारी गर्दै उनलाई जिल्ला प्रहरी कार्यालयमा झिकाइएको छ’ प्रहरी निरिक्षक पाण्डे भने । प्रहरीका अनुसार प्रहरीले पीडित युवालाई पनि जिल्लामा बोलाएको छ । यद्यपि, पीडितले अहिलेसम्म ती वडा अध्यक्षविरुद्ध जाहेरी भने दिएका छैनन् ।

स्थानीयलाई कुटेको भिडियोका आधारमा र प्रहरी प्रतिवेदन अनुसार मुद्दा चलाइने बताईएको छ ।

“हामीले पीडितलाई जाहेरी दिन आग्रह गरेका छौँ, पीडितले जाहेरी नदिएपनि कानुन बमोजिम कारबाही हुन्छ,” उनले भने ।