जसपाद्वारा ३ जना प्रदेशसभा सदस्यलाई निस्काशसनको पत्र लुम्बिनी प्रदेशसभा सचिवालयमा दर्ता

बुटवल । जनता समाजवादी पार्टी जसपाले लुम्बिनी प्रदेशसभामा रहेका आफ्ना तीन जना सदस्यलाई निस्काशन गरेको पत्र प्रदेशसभामा दर्ता गरेको छ ।

जसपा कार्यकारिणी समितिको बैठकले पार्टीको अनुशासन उल्लंघन गरेको अभियोमा तीन जना प्रदेशसभा सदस्यलाई निस्काशन गरेको पत्र प्रदेशसभा सचिवालयमा दर्ता गरेको हो । जसपा प्रदेशसभा संसदीय दलका नेता सहसराम यादवले हस्ताक्षर गरको पत्रमा सांसदहरु सन्तोषकुमार पाण्डेय, विजयबहादुर यादव र कल्पना पाण्डेलाई निश्कासन गरेको जानकारी गराइएको छ ।

जसपाले निस्काशन गरिएको पत्रसँगै गत असार ३ गतेको कार्यकारिणी समिति बैठकको निर्णय र प्रदेशसभा सदस्यहरुलाई सोधेको स्पष्टीकरण पत्रको प्रतिलिपि, साउन १२ गतेको कार्यकारिणी समिति बैठकको निर्णयको प्रतिलिपि र असार ५ गते पार्टीको आधिकारिक इमेल र ६ गते हुलाकबाट पठाइएको पत्रको प्रतिलिपि पनि प्रदेशसभा सचिवालयलार्य उपलब्ध गराएको छ ।

जसपाको महन्थ ठाकुर पक्षमा रहेका चार जना प्रदेशसभा सदस्यमध्ये सुमन शर्मा रायमाझीले सरकारबाटै राजीनामा दिएर पार्टीको निर्देशन अनुसार चल्ने प्रतिवद्धता जनाएका कारण उनलाई कारवाही गरिएको छैन । पाण्डेय, यादव र पाण्डे हाल शंकर पोखरेल नेतृत्वको सरकारमा मन्त्री रहेका छन् ।

लुम्बिनीका विपक्षी दलहरुले पोखरेल सरकार अल्पमतमा रहेको भन्दै तत्काल राजीनामा दिन या विश्वासको मत लिन चुनौती दिइरहेका छन् ।