काठमाडौं । पहाडी भू-भाग तथा पूर्वी क्षेत्रको मौसम शनिबार आंशिकदेखि सामान्य बदली हुने जल तथा मौसम पूर्वानुमान महाशाखाले जनाएको छ ।
पश्चिमी न्यून चापीय प्रणाली, दक्षिण-पूर्व भू-भाग नजिक रहेको पूर्व-पश्चिम फैलिएको न्यून चापीय रेखा तथा बंगालको खाडीबाट प्रवाह हुने जलवाष्प युक्त हावाको प्रभावले मौसम बदली भएको हो ।
अहिले पहाडी भू-भागका केहि स्थान तथा प्रदेश १ को तराई भू-भागमा आंशिकदेखि सामान्य बदली रही बाँकी क्षेत्रको मौसम सामान्यतया सफा रहेको छ ।
शनिबार दिउँसो प्रदेश १, प्रदेश २, बागमती प्रदेश र गण्डकी प्रदेशमा सामान्यदेखि पूर्ण बदली र बाँकी क्षेत्रमा आंशिकदेखि सामान्य बदली रहने छ । केही स्थानहरुमा मेघ गर्जन र चट्याङ्ग तथा हावाहुरीसहित हल्कादेखि मध्यम वर्षाको सम्भावना रहेको मौसमविदले बताएका छन् ।
यस्तै राति प्रदेश १, प्रदेश २ तथा बाँकी प्रदेशका पहाडी भू-भागमा सामान्यदेखि पूर्ण बदली र अरु क्षेत्रमा आंशिकदेखि सामान्य बदली रहने छ ।
देशका थोरै स्थानहरुमा मेघ गर्जन र चट्याङ्ग तथा हावाहुरीसहित हल्कादेखि मध्यम साथै प्रदेश १ का एक-दुई स्थानमा भारी वर्षाको सम्भावना छ ।
प्रतिक्रिया