बागमती प्रदेशसभामा मुख्यमन्त्री पौडेल विरुद्ध अविश्वासको प्रस्ताव पेश

काठमाडौं । अन्ततः बागमती प्रदेशसभाको बैठकमा मुख्यमन्त्री पौडेल विरुद्ध अविश्वासको प्रस्ताव पेश भएको छ ।

नेकपा प्रचण्ड-नेपाल पक्षका सभासदहरुले मुख्यमन्त्री डोरमणी पौडेल विरुद्ध अविश्वासको प्रस्ताव दर्ता भएपछि बैठक डाक्न आलटाल गरिए पनि आज शुक्रबार उनी विरुद्ध प्रस्ताव पेश भएको हो ।

बैठकको प्रारम्भमा नै प्रचण्ड-नेपालपक्षका सभासदहरुले मुख्यमन्त्री डोरमणी पौडेलविरुद्धको अविश्वास प्रस्तावमाथि छलफल गर्न माग गरेका थिए ।

दिउँसो १ बजे बसेको प्रदेशसभाको बैठकमा सभामुख सानुकुमार श्रेष्ठले सांसद् अरुण नेपाललाई मुख्यमन्त्री पौडेलविरुद्धको अविश्वासको प्रस्ताव सदनमा पेस गर्न अनुमति दिएका थिए ।

पुस १० गते सत्तारुढ नेकपाका दाहाल–नेपाल समूहका ४५ जना सांसदहरुको हस्ताक्षरसहित अविश्वासको प्रस्ताव प्रदेशसभा सचिवालयमा दर्ता भएको थियो ।

अविश्वासको प्रस्ताव प्रदेशसभामा पेस गर्दै पार्टी विवादका कारण राजिनामा दिएका पूर्व उद्योग, वन, वातावरण तथा पर्यटनमन्त्रीसमेत रहेका नेपालले मुख्यमन्त्री पौडेलले तीन वर्षको अवधिमा प्रदेशलाई स्थापित गर्नबाट चुकेको, कोरोना महामारीमा प्रदेश सरकारको भूमिका कमजोर रहेको र प्रदेशप्रति जनताको विश्वास कमजोर बन्दै गएको कारण अविश्वासको प्रस्ताव दर्ता गरिएको बताए ।

सांसद नेपालले सदनमा मुख्यमन्त्री पौडेललाई नेकपाको संसदीय दलको नेताबाट पदमुक्त गरिएको र नयाँ मुख्यमन्त्रीको रुपमा अष्टलक्ष्मी शाक्यलाई प्रस्ताव गरिएको समेत जानकारी गराएका छन् ।

अविश्वासको प्रस्तावमा हस्ताक्षर गरेका सांसदहरुले अविश्वासको प्रस्तावमाथि बोल्ने कार्यक्रम तय भएपनि अविश्वासको प्रस्तावमाथिको कारबाही भने आजै सुरु हुन सकेन ।

सचिवालयका अनुसार अविश्वास प्रस्ताव कार्यान्वनका लागि कार्यविधि तय भइसकेको छैन । कार्यविधि तय गर्न सर्वदलीय कार्यदल बनेको छ । कार्यदल छलफलकै चरणमा छ । कार्यदलले कार्यविधि तय गरेपछि अविश्वासको प्रस्ताव कारबाही प्रक्रियामा प्रदेशसभा सचिवालयले जानकारी दिएको छ ।

प्रदेशसभाको अर्को बैठक माघ १९ गते दिउँसो २ बजे बस्ने भएको छ ।