बेनी । म्याग्दी जिल्लामा लक्षण सहितका कोरोना संक्रमित भेटिने क्रम बढेपछि सदरमुकाम बेनी बजारमा स्थानीय प्रशासनले लकडाउन जारी गरेको छ । जिल्लामा हरेक दिन कोरोना संक्रमित थपिन थालेपछि प्रशासनले शुक्रबार रातीदेखि लागू हुने गरि एक हप्ताका लागि लकडाउन (बन्दाबन्दी) घोषणा गरेको हो ।
जिल्ला प्रशासन कार्यालय, म्याग्दीले कात्तिक १४ गते राती १२ बजेदेखि २१ गते १२ बजेसम्मका लागि लकडाउन घोषणा गरेको छ । प्रमुख जिल्ला अधिकारी उमाकान्त अधिकारीले कोरोना संक्रमण थप फैलन नदिन बेनी नगरपालिकाको आग्रह र कोभिड–१९ संकट ब्यवस्थापन केन्द्रको निर्णय अनुसार लकडाउनको घोषणा गरिएको बताए ।
म्याग्दी उद्योग बाणिज्य संघले बजारमा स्वास्थ्य मापदण्ड पालना नभएको र भिडभाड पनि बढेको भन्दै यस अघि नै लकडाउन गर्न आग्रह गरेको थियो ।
प्रशासनद्धारा जारी सूचनामा बेनी नगरपालिका, वडा कार्यालयहरु, सदरमुकाम स्थित बैंक, बित्तिय संस्था र सरकारी कार्यालयहरुबाट प्रदान गरिने सबै सेवा सेवा बन्द हुने उल्लेख छ ।
सुचनामा औषधी बाहेकका पसहलहरु खेल्नका लागि बिहान ८ देखि १० बजे (दुई घण्टा)को समय तोकिएको छ ।
लकडाउनको सुचनामा अत्यावश्यक काम बाहेक सुरक्षा र जनस्वास्थ्य मापदण्ड पालना नगरी घर बाहिर निस्कन रोक लगाइएको छ ।
लकडाउनको अवधिमा संक्रमित फेला परेका छिमेकी जिल्लाबाट म्याग्दीमा आवत जावत नगरिदिन समेत प्रशासन र नगरपालिकाले आग्रह गरेका छन् । केही दिनयता जिल्ला सदरमुकाम बेनी बजारका ब्यवसायी, सहकारिका कर्मचारी र स्थानीयबासीमा कोरोना संक्रमण पुष्टि हुने क्रम बढेपछि प्रशासनले कडाई गरेको हो ।
प्रतिक्रिया