नेपालगन्ज । बिश्व बिद्यालयहरुमा भागवण्डाका आधारमा राजनितिक नियुक्ति गर्ने परिपाटीको अन्त्य गर्दै मध्यपश्चिम विश्वविद्यालयमा प्रतिस्पर्धाका आधारमा रजिष्ट्रार नियुक्त गरिएको छ ।
खुल्ला प्रतिस्पर्धाबाट छनौट हुँदै विश्वविद्यालयको रजिष्ट्रारमा सहप्राध्यापक डा. नारायणप्रसाद पौडेल नियुक्त भएका छन् । गत असार २२ गते आह्वान गरेको दरखास्तमा प्रतिस्पर्धिहरुलाई उछिन्दै डा. पौडेल रजिष्ट्रारमा नियुक्त भएका हुन् ।
रजिष्ट्रारका लागि १९ जनाको आवेदन परेको थियो । काठमाडौँ विश्वविद्यालयका पूर्वउपकुलपति प्रा.डा. सुरेशराज शर्मा नेतृत्वको तीन सदस्यीय छनोट समितिले आवेदकहरुको आवश्यक मापदण्डका आधारमा डा पौडेललाई छनोट गरि नियुक्तिका लागि सिफरिस गरेको थियो ।
उन्नाइस जनाबीचको प्रतिस्पर्धामा समितिले छनोट गरेका सह प्रा.डा. पौडेललाई रजिष्ट्रार नियुक्तिकालागि मध्यपश्चिम विश्वविद्यालयका कुलपति तथा प्रधानमन्त्रीसमक्ष सिफारिस गरिएकोमा कुलपतिका हैसियतले प्रधानमन्त्रीले नियुक्ति स्वीकृत गरेको उपकुलपति प्रा.डा. नन्दबहादुर सिंहले जानकारी दिए ।
उपकुलपति प्रा.डा. सिंहले यसअघि राजनीतिक शक्तिका आधारमा विश्वविद्यालयमा रजिष्ट्रार नियुक्ति गरिने प्रणाली पूर्णरूपले तोडिएको जिकिर गर्दै प्रतिस्पर्धाको सुरुवात मध्य पश्चिम बिश्वबिद्यालयबाट भएकोमा खुसी ब्यक्त गरे ।
यसैगरी विश्वविद्यालयले मानविकी तथा समाजशास्त्र सङ्काय, व्यवस्थापन सङ्काय, विज्ञान तथा प्रविधि सङ्काय र शिक्षाशास्त्र सङ्काय गरी रिक्त चारवटा डिन पदको खुला प्रतिस्पर्धामा भाग लिन दरखास्त आह्वान गरेको छ ।
प्रतिक्रिया