पोखरा । गण्डकी प्रदेशमा नेपाल प्रहरी, स्वास्थ्यकर्मी, किराना पसलेसहित थप ३५ जनामा कोरोना भाइरसको संक्रमण पुष्टि भएको छ ।
प्रदेश स्वास्थ्य निर्देशनालयका अनुसार क्षयरोग उपचार केन्द्र, पोखरा, भरतपुर अस्पताल, चितवन र राष्ट्रिय जनस्वास्थ्य प्रयोगशाला, काठमाडौँ गरिएको परिक्षणमा विभिन्न चार जिल्लाका ३५ जनामा संक्रमण पुष्टि भएको हो ।
संक्रमित हुनेहरुमा तनहुँका १, कास्कीका २३, लमजुङका ४ र नवलपरासी (बर्दघाट सूस्ता पूर्व)का ७ जना रहेका छन् । संक्रमितमध्ये तनहुँ जिल्ला, सुक्लागण्डकी-१ का संक्रमित महिला पोखराको अमरसिंह चोकमा रहेको पार्कल्याण्ड अस्पतालमा कार्यरत स्टाफनर्स हुन् । यस्तै, पोखरा महानगरपालिका-१७ का २० जना नेपाल प्रहरीमा कार्यरत छन् ।
लमजुङ जिल्ला, सुन्दरबजारका-२ का ५० बर्षीय पुरुष ओमानबाट आएका हुन् भने सुन्दरबजार-९ का ४९ बर्षीय महिला स्थानीय किराना पसल संचालक हुन् । अन्यको कन्ट्याक्ट ट्रेसिङको क्रममा संक्रमण पुष्टि भएको हो ।
यससँगै अध्यावधिक विवरण अनुसार गण्डकी प्रदेशमा कोरोना संक्रमितको संख्या दुई हजार २ सय ४५ पुगेको छ ।
प्रतिक्रिया