सप्तरी । कोरोना भाइरसको परीक्षणलाई तिब्र बनाउन आवश्यक भीटीएम (स्वाब राख्ने भाडो) को अभाव भई समस्या भइरहेका बेला प्रदेश २ सरकारले थप १ हजार ५ सय भीटीएम उपलब्ध गराएको छ ।
जिल्ला स्वास्थ्य कार्यालय सप्तरीका अनुसार प्रदेश २ सरकारको प्रादेशिक स्वास्थ्य आपूर्ती, व्यवस्थापन केन्द्रमार्फत शुक्रबार गजेन्द्र नारायण सिंह अस्पतालको पीसीआर प्रयोगशालाका लागि १ सय ५ सय थान भीटीएम प्राप्त भएको हो ।
जिल्लामा कोरोना परीक्षणको दायरा बढाउँदै लगेपछि केही दिनयता दैनिक २ सय देखी ३ सयसम्म आसंकितहरुको स्वाब संकलन गरि पीसीआर परीक्षण थालिएपछि भीटीएमको अभाव हुन गएको थियो ।
पछिल्लो पटक १ सय २० थान मात्र भीटीएम स्टक रहँदा कोरोना परीक्षण सुस्त बनेको थियो । सप्तरीहालसम्म १३ हजार ३ सय ७२ जनाको स्वाब संकलन गरि परीक्षण गरिसकिएको छ ।
जिल्लामा दैनिक कोरोना संक्रमित थपिदै गई संक्रमितको सम्पर्कमा आएका तथा स्वेच्छाले पीसीआर गराउनेको संख्या समेत बढ्दै गएकाले प्रदेश सरकारसँग थप भीटीएम माँग गरिएको जिल्ला स्वास्थ्य कार्यालयका प्रमुख दुनियालाल यादवले जानकारी दिए ।
सप्तरीमा हालसम्म ५ जनाको कोरोनाबाट ज्यान गइसकेको छ भने कुल संक्रमितको संख्या ७ सय ७९ पुगेको छ । यस्तै आइसोलेशनमा रहेका संक्रमितको संख्या २ सय ३५ रहेको छ भने निको भई डिस्चार्ज हुनेको संख्या ५ सय ४४ रहेको जिल्ला स्वास्थ्य कार्यालयले जनाएको छ ।
प्रतिक्रिया