प्रदेश ५ प्रहरी प्रमुख र मातहतका प्रहरी प्रमुखबीच कार्यसम्पादन सम्झौता सम्पन्न

दाङ । प्रधानमन्त्री केपी शर्मा ओलीले आफ्नै मन्त्रीहरुलाई र सचिवहरुलाई लिखित कार्य सम्पादन सम्झौता गरेकै शैलीमा नेपाल प्रहरीले आफ्नो मातहतका निकायसँग लिखितरुपमा कार्यसम्पादनको सम्झौता गर्ने अभियान थालेको छ ।

प्रहरी महानिरिक्षक शैलेश थापाले गत साउन २५ गते ७ वटै प्रदेश प्रहरी प्रमुखसँग कार्यसम्पादन सम्झौता गरेका थिए भने आईतबार प्रदेश ५ प्रहरी कार्यालयका प्रहरी प्रमुख, प्रहरी नायव महानिरिक्षक रबिन्द्र सिंह धानुकले प्रदेश ५ का सबै प्रहरी प्रमुखहरुलाई प्रदेश ५ प्रहरी कार्यालय दाङमा बोलाएर कार्यसम्पादन सम्झौता गराएका छन् ।

प्रदेश नं. ५ अन्तर्गत जिल्लाका प्रहरी प्रमुखहरु तथा र ५ नं. प्रदेश प्रहरी प्रमुख बिच आईतबार कार्यसम्पादन सम्झौता भएको छ । प्रहरी नायब महानिरीक्षक रबिन्द्र बहादुर धानुक र प्रहरी तालिम केन्द्र बुटवल, दंगा नियन्त्रण प्रहरी गण सुनवल, सशस्त्र प्रहरी गण खजुरा बाँके, प्रदेश ट्राफिक प्रहरी कार्यालय बुटवल, १२ वटै जिल्लाका जिल्ला प्रहरी कार्यालय तथा नेपाल प्रहरी स्कूल घोराही दाङ समेत १७ वटा मातहत कार्यालयका कार्यालय प्रमुखहरुबिच कार्य सम्पादन सम्झौतामा हस्ताक्षर भएको हो ।

कार्य सम्पादन सम्झौतापछि प्रदेश भरीका मातहतका निकायका प्रमुखहरुलाई निर्देशन दिंदै ५ नं प्रदेश प्रहरी प्रमुख प्रहरी नायब महानिरीक्षक धानुकले सम्झौतामा उल्लेखित लक्ष्य पुरा गर्न प्रभावकारी ढंगले अगाडी बढ्न निर्देशन दिए । सम्झौतामा उल्लेखीत लक्ष्य प्राप्तीकालागि स्पष्ट कार्य योजनाका साथ सम्पूर्ण प्रहरी इकाई तथा कर्मचारीहरुलाई पूर्ण लगनशील र प्रतिवद्धताका साथ परिचालन गर्न प्रहरी नायब महानिरीक्षक धानुकले निर्देशन दिएका थिए ।

कार्य सम्भपादन सम्झौतामा ५ नं. प्रदेशको नागरिकको शान्ति सुरक्षाको प्रभावकारी व्यवस्थापन, अपराध नियन्त्रणका साथै अपराध अनुसन्धान तथा सवारी दुर्घटना न्यूनिकरणको लागि प्रविधियुक्त अनुसन्धान प्रणालीको विकास, आर्थिक अनुशासन र पारदर्शिता, मानव अधिकार संरक्षण र सामुदायीक केन्द्रित प्रहरी कार्यहरुलाई मुख्य प्राथमिकतामा राखिएको छ ।

वर्षायामको समय रहेकोले प्राकृतिक रुपमा आईपर्ने विपद्को व्यवस्थापनको लागि उद्दार सामग्री सहित जनशक्तिलाई तयारी हालतमा राख्न डीआइजी धानुकले निर्देशन दिए । उनले कोभिड-१९ महामारीको समय रहेकोले सदैव अग्रपंक्तिमा रहने नेपाल प्रहरीले कर्तव्य पालनाको सिलसिलामा आवश्यक सावधानी र सुरक्षा अपनाउनका लागि समेत मातहतका प्रहरी अधिकृतहरूलाई सल्लाह दिएका थिए ।