बुधबार थपिए २५५ जना कोरोना संक्रमित, हालसम्म संक्रमितको संख्या १६ हजार ४२३ पुग्यो

काठमाडौं । कोरोना भाइरसको महामारीबाट नेपाल पनि निकै प्रभावित बनेको छ । पछिल्लो २४ घण्टामा २५५ जना थपिएका छन् ।

हालसम्म देशभर संक्रमितको संख्या १६ हजार ४२३ पुगेको स्वास्थ्य तथा जनसंख्या मन्त्रालयले जनाएको छ ।
काठमाडौं उपत्यकाभित्र काठमाडौंका १६ जना र ललितपुरका ७ जना गरी २३ जना नयाँ संक्रमित थपिएका छन् ।

गत २४ घण्टामा ४ हजार ६९६ जनाको पीसीआर परीक्षण भएको थियो ।

यसैगरी २५३ जना निको भएर घर फर्किएका छन् । हालसम्म ७ हजार ७५२ जना (४७ दशमलव २ प्रतिशत) डिस्चार्ज भैसकेका छन् ।

सार्क सदस्य राष्ट्रहरुमध्ये नेपाल पीसीआर टेस्ट गर्ने अफगानिस्तान, बंगलादेश, श्रीलंका पाकिस्तान र भारतभन्दा अघि रहेको स्वास्थ्य तथा जनसंख्या मन्त्रालयले जनाएको छ ।