नेपालगन्ज । बांकेमा १ जना नाबालकको घांटी काटेर हत्या प्रयास भएको छ । कोहलपुरका ७ वर्षिय बालकको घांटी काटेर हत्या प्रयास भएको हो ।
कोहलपुर नगरपालिका वडा नम्बर– १३ का ७ वर्षीय एक बालकको घांटी काटेर हत्या गर्ने प्रयास गर्ने एक जनालाई प्रहरीले नियन्त्रणमा लिएको छ ।
जिल्ला प्रहरी कार्यालय बाँकेका प्रवक्ता प्रहरी नायव उपरीक्षक सुबाश खड्काले घांटीमा हंसियाले प्रहार गर्ने राप्तिसोनारी गाँउपालिका वडा नम्बर–९ बस्ने ३४ वर्षिय विजय चन्दलाई पक्राउ गरिएको जानकारी दिए । उनले कोहलपुर खड्कवारका ७ वर्षिय बालक रोमित थारुको गर्दनमा हंसिया प्रहार गरि काटेको पाईएकोले चन्दलाई पक्राउ गरिएको बताए । खड्काका अनुसार चन्दको घरमा रहेको हेण्डपम्पमा आंप धुन गएको रिसमा बालकलाई हंसिया प्रहार गरेको पक्राउ परेका चन्दले प्रहरीलाई बयान दिएका छन् ।
बालक आफ्नो मामाको घरमा रोपाइँ गर्न गएका बेलामा चन्दले धारिलो हतियार हँसिया प्रयोग गरी घाँटीको पछाडीको भागमा (गर्दन) रेटेर घाइते बनाएका थिए । घाइते बालकको कोहलपुर मेडिकल कलेजमा उपचार भईरहेको डिएसपी खड्काले बताए ।
प्रतिक्रिया