संविधान संशोधनसँगै प्रधानसेनापति र सशस्त्र आईजीको कालापानी क्षेत्र भ्रमणबाट भारतमा खैलाबैला

काठमाडौं । नेपाली सेनाका प्रधानसेनापति पूर्णचन्द्र थापा र सशस्त्र प्रहरीका आईजी शैलेन्द्र खनाल एक साथ भारतले अतिक्रमण गरेको कालापानी नजिकैका सशस्त्रका (बीओपी) र नेपाली सेनाका सुरक्षा पोष्टको निरीक्षण गर्न पुगेपछि भारतमा खैलाबैला सुरु भएको छ ।

प्रतिनिधिसभा र राष्ट्रियसभामा ४५ वर्ष अघि छुटाईएको भुभाग समेटेर नयाँ नक्साका साथ निशान छाप बनाउन संविधान संशोधनको प्रक्रिया चलिरहँदा राज्यको मुख्य सुरक्षा संयन्त्र मध्यका २ वटा सुरक्षा फौजका प्रमुखहरु अतिक्रमित भुमि नजिकैको सुरक्षा पोष्टहरुमा पुगेपछि भारतीय मिडियाले चर्चा गर्न थालेका हुन् ।

सुरक्षा प्रमुखद्वयले दार्चुलाको छाङगरुको सुरक्षा बेस क्याम्प नीरिक्षण गर्नुका साथै सशस्त्रले सिमामा तयार गरेको सुरक्षा पोष्ट बिओपीको निरीक्षण गरेका थिए ।

लिम्पियाधुरादेखि कालापानीसम्मको नेपालको करिब ४०० वर्गकिलोमिटर भूमि अतिक्रमण गरेर दशकौंदेखि बसेको भारतका लागि नेपालका सुरक्षा प्रमुखहरु त्यस क्षेत्रमा पुग्दा चिड्चिडाहट पैदा भएको हो ।

फेक न्यूजको धन्धा चलाउने भारतीय टेलिभिजन च्यानलहरुले नेपालले उक्साउने गतिविधि गरेको टिप्पणी गरेका छन् । भारतीय एबीपी न्यूजले सिमामा तनाव भएको बेला नेपाली सेना प्रमुखको कालापानी भ्रमण भन्दै भ्रमण प्रति टिप्पणी गरेको छ । छाङगुरुमा सशस्त्रको सुरक्षा पोष्ट स्थापना भएखेखि नै कालापानीको निगरानी गर्न नेपालले पोष्ट स्थापना गरेको एबीपीको विश्लेषण छ ।

प्रधानसेनापति थापाले नेपाली सेनाले ब्यास गाउँपालिका २ घाटीबगडमा गोरेटो बाटो निर्माण गरिरहेको अनुगमन समेत गरेका थिए । ९ जेठबाट नेपाली सेनाले व्यास जोड्ने बाटो निर्माण शुरु गरेको छ । यतिबेला घाँटीबगडदेखि मौर्याभिरसम्मको कठिन भुगोलमा ४ सय मिटरको बाटो निर्माण भइरहेको छ।

यसैगरी, सशस्त्र प्रहरीको छाँगरुमा बीओपी रहेको छ । प्रधान सेनापति थापा सहित सशस्त्र प्रहरीका आइजी खनालले त्यसको अनुगमन गरेका थिए । उनीहरु दार्चुलाको खलंगामा निर्माण भएको सशस्त्र प्रहरी नम्बर ५० गुल्मको उदघाटन कार्यक्रममा सहभागि समेत भएका थिए । गुल्मको सशस्त्र आइजीबाट उदघाटन भएको थियो । कार्यक्रमलाई सम्बोधन गर्दै प्रधान सेनापति थापाले जुन सुरक्षा निकाय भए पनि उद्देश्य एउटै भएकाले दुवै निकायबीच सदैव सहकार्य रहने बताएका थिए । उनले सशस्त्रका अधिकारी सहित तैनाथ युनिटलाई उच्च मनोबलका साथ सरकारले दिएको जिम्मेवारी पूरा गर्न भनेका थिए ।

कार्यक्रममा सशस्त्र प्रहरी प्रमुख खनालले पनि सीमा सुरक्षा जस्तो गहन जिम्मेवारी पूरा गर्न दत्तचित्त भएर लाग्न मातहतका निकायलाई निर्देशन दिएका थिए ।

नेपाली सेनाका प्रवक्ता विज्ञानदेव पाण्डेले प्रधानसेनापति थापाको भ्रमणलाई नियमित भ्रमण बताएका छन् । पृतनाको निरीक्षण तथा सेनाले बनाईरहेको घाटीबगरको सडक निर्माणको निरिक्षणका क्रममा प्रधानसेनापतिको भ्रमण भएको पाण्डेले बताएका थिए ।

तर, लद्दाखमा पछिल्लो पटक सिर्जित तनावपछि त्रिदेशीय सीमामा भारत र चीन दुवै मुलुकले उपस्थिति बढाइरहेका वेला नेपालका दुई सुरक्षा अंगका प्रमुख छाङरु पुग्नुलाई अर्थपूर्ण तरिकाले हेरिएको छ ।

चीन र भारतीय सेनाकाबीच तनाव भएका बेला प्रधानसेनापति थापा, सशस्त्र प्रहरीका आइजी खनालसहित कालापानी क्षेत्र पुगेकोमा भारतले चासो देखाएको हो । भारतीय सुरक्षा निकायले यसलाई नजिकबाट नियालेको भारतीय सञ्चाल माध्यमले दाबी गरेका छन् ।

इन्डियन एक्सप्रेसले नेपालको राष्ट्रियसभाले नेपालको नयाँ नक्शा समेटेको निशान छाप अनुमोदन गर्न संविधान संशोधन प्रस्ताव पारित गर्नै लाग्दा सेनापति सशस्त्रका आइजीपीसहित कालापानी नजिकैको छाङगरुमा पुगेको भन्दै बिहीबार टिप्पणी गरेको थियो ।

कालापानी, लिम्पियाधुरा र लिपुलेकसहितको भुभाग समेटेर नेपालले नयाँ नक्शा जारी गरेपछि भारत असन्तुष्ट रहँदै आएको छ । संसदबाटै यसको अनुमोदन प्रक्रिया बढेपछि भारतले वार्ताको वातावरण बिग्रिएको सन्देश दिइरहेको छ । तर, भारतले गत नोभेम्बरमै नेपाली अतिक्रमित भूमिलाई समेटेर नयाँ नक्शा जारी गरेको थियो र त्यो नक्शालाई संसदबाट अनुमोदन गरेको थियो ।