चितवनका कोरोना संक्रमितको कन्ट्याक्ट ट्रेसिङ गरियो, केशरवाग सिल

चितवन । चितवनको भरतपुर-६ केशरबागमा मा शुक्रबार बिहान भेटिएका दुई जना वृद्धवृद्धाको कन्ट्याक्ट ट्रेसिङ गरिएको छ ।

७४ वर्षीय पुरुष र ७३ वर्षीय महिलामा कोरोना संक्रमण देखिएसंगै कन्ट्याक्ट ट्रेसिङ’ सँगै केशरबागलाई पनि सिल गरिएको चितवनका प्रमुख जिल्ला अधिकारी नारायणप्रसाद भट्टराईले बताउनुभयो । वडालाई सील गरेर आवातजावत पूर्णरुपमा बन्द गरिएको छ ।

संक्रमितहरु घर आएदेखि नै घरकै माथिल्लो तलमा क्वारेन्टिन निर्माण गरेर बसेको वडा नं. ६ का वडाअध्यक्ष हरिविलास कोइरालाले बताउनुभयो । उनीहरूल घरका सदस्यसंग र वरिपरि कसैसंग पनि भेट नगरेको जानकारी दिनुभयो ।

भारतको दिल्लीस्थित राजिव गान्धी क्यान्सर अस्पतालमा वृद्ध पुरूषको उपचार गरी उनीहरू जेठ ३ गते एम्बुलेन्सबाट घर आएका थिए । क्यान्सरको उपचारका लागि बुबा, आमा र छोरा भारत गएका थिए ।

घर फर्किएपछि उनीहरूको स्वाव परीक्षण गरिएको थियो । तीन जनाकै परीक्षण गर्दा श्रीमान र श्रीमतीमा मात्रै संक्रमण देखिएको हो । छोरामा भने संक्रमण नदेखिएको भरतपुर अस्पतालका अध्यक्ष डा.भोजराज अधिकारीले जानकारी दिनुभयो ।

संक्रमण पुष्टि भएसंगै उनीहरुलाई आज विहानै भरतपुर कोरोना विशेष (अस्थायी) अस्पतालमा राखिएको छ । योसंगै चितवनमा कोरोना संक्रमितको संख्या ५ पुगेको छ ।