संघीय संसदको महासचिवमा डा. गौतम सिफारिस

काठमाडौं । संघीय संसदको महासचिवमा डा. भरतराज गौतमलाई सिफारिस गरिएको छ ।

प्रतिनिधिसभाका सभामुख अग्निप्रसाद सापकोटा र राष्ट्रिय सभाका अध्यक्ष गणेशप्रसाद तिमिल्सिनाले आज गौतमलाई संसदको महासचिवका लागि सिफारिस गर्नुभएको हो ।

गौतमलाई महासचिव नियुक्तिका लागि सभामुख र अध्यक्षले राष्ट्रपति विद्यादेवी भण्डारीकहाँ सिफारिस गरेको संघीय संसदका कार्यवाहक महासचिव गोपालनाथ योगीले जानकारी दिनुभयो । राष्ट्रपतिले संसदको महासचिव नियुक्त गर्ने संवैधानिक व्यवस्था छ । गौतम संसद सचिवालयका सचिव हुनुहुन्छ ।

मनोहरप्रसाद भट्टराईको कार्यकाल सकिएपछि संसदको महासचिव पद खालि थियो । भट्टराईको पद रिक्त भएपछि सभामुख सापकोटाले संसदका सचिव गोपालनाथ योगीलाई कार्यबहाक महासचिव तोक्नुभएको थियो ।