देवदहको विपद् व्यवस्थापन कोषमा ईट्टा संघको ६० हजार

भैरहवा । कोरोना भाइरस संक्रमणको रोकथाम तथा नियन्त्रणका लागि रुपन्देहीको देवदह नगरपालिकाले स्थापना गरेको विपद् व्यवस्थापन कोषमा लुम्बिनी ईट्टा उद्योग व्यवसायी संघ रुपन्देहीले सहयोग गरेको छ । संघले कोषलाई ६० हजार रुपैयाँ उपलब्ध गराएको हो ।

संघका लेखा समिति सदस्य चक्रपाणि तिवारीले मंगलबार नगरपालिकाका प्रमुख हिरा बहादुर खत्री र उपप्रमुख विद्या लक्ष्मी गुरुङलाई संयुक्त रुपमा ६० हजारको चेक हस्तान्तरण गर्नुभयो ।

यस अघि संघले प्रदेश ५ सरकारद्धारा स्थापना गरिएको कोरोना भाइरस नियन्त्रण तथा उपचार कोषमा १ लाख ११ हजार १ सय ११ रुपैयाँ सहयोग गरेको लुम्बिनी ईट्टा उद्योग व्यवसायी संघका महासचिव अजय कुमार गुप्ताले बताउनुभयो ।

त्यस्तै संघले रुपन्देहीको तिलोत्तमा नगरपालिकामा ५१ हजार, मायादेवी गाउँपालिकामा ८५ हजार, रोहिणीमा ८१ हजार, ओमसतियामा ७५ हजार, कोटहीमाईमा ३५ हजार, सियारी र शुद्धोधनमा ३०/३० हजार सहयोग गरेको गुप्ताले जानकारी दिनुभयो ।

त्यस्तै संघले जिल्ला विपद् व्यवस्थापन समिति रुपन्देहीलाई ५१ हजार १ सय ११ बराबरको खाद्यान्न सामाग्री सहयोग गरेको उहाले बताउनुभयो । संघका अध्यक्ष थानेश्वर घिमिरेको अगुवाइमा राष्ट्रिय विपद्को घडीमा सहयोगको हात अगाडी बढाइएको छ, उहाले भन्नुभयो ।

त्यस्तै कोरोना भाइरसको संक्रमणबाट बच्न र अरुलाई बचाउन घरभित्रै बसेर सुरक्षित हुन संघले सबैलाई आग्रह समेत गर्नुभएको छ ।